नीट परीक्षा पेपर लीक मामला का लय कय कांग्रेस कय पूरै देस मा चलय वाला अभियान ‘छात्रन कय गूंज’ कय उत्तराखंड मा सुरुअत होइ गय है। ई अभियान 40 दिन तक देस कय खास शहरन मा छात्रन, अभ्यर्थियन, कोचिंग हब, कॉलेज कैंपस, पुस्तकालयन अउर नौजवानन कय बीच चलाय जाई। पेपर लीक मामला मा कांग्रेस केंद्र अउर राज्य कय भाजपा सरकार पर कड़ा निसाना साधेस। प्रेस क्लब मा राज्यसभा सांसद रंजीत रंजन अउर चुनाव अभियान समिति कय अध्यक्ष प्रीतम सिंह पोस्टर जारी कइ कय अभियान कय श्रीगणेश कीहिन।
प्रेसवार्ता मा रंजीत रंजन कहिन कि पिछलै कुछ सालन मा पूरै देस मा लगभग 89 से बेसी पेपर लीक अउर परीक्षा घोटाला सामनै आय हय। नीट पेपर लीक कय बाद देस भर मा 20 से बेसी लइकन खुदकुशी कइ लिहिन हय। एहमा देहरादून कय बिटिया रिया थापा कय नांऊ भी सामिल हय। बहुतै छात्र आपन सुसाइड नोट मा ई सरकरी बेवस्था से टूटय अउर अंधियारे भविष्य कय जिक्र कीहिन हय।
लोकसभा मा नेता प्रतिपक्ष राहुल गांधी कय अगुवाई मा कांग्रेस ई ‘छात्रन कय गूंज’ अभियान शुरू करे हय। ई उन छात्रन अउर नौकरी खोजय वालन कय अवाज आय जेकर मिहनत बार-बार पेपर लीक, परीक्षा रद्द होय, रिजल्ट मा देरी, भरती अटकय अउर एनटीए (NTA) कय नाकामी कय वजह से माटी मा मिल रही हय। ई खाली एक पेपर लीक कय मामला नांय आय, ई नौजवानन कय भविष्य से जुड़ा मामला अहै। कांग्रेस जब तक न्याय नांय मिलि जाई, तब तक लइकन कय भविष्य कय खातिर लड़त रही।
कांग्रेस कय मांग अहै कि नीट पेपर लीक मामला मा केंद्रीय शिक्षा मंत्री धर्मेंद्र प्रधान आपन पद से इस्तीफा दईं। साथै मा पूरै परीक्षा बेवस्था कय लय कय एनटीए, पेपर सेटिंग, प्रिंटिंग, ट्रांसपोर्ट, परीक्षा केंद्र, डिजिटल सिस्टम अउर वेंडर कांट्रेक्ट कय जांच होय, अउर हर साल परीक्षा अउर भरती कय कैलेंडर लागू कीन जाय।
ई मौका पर अभियान कय संयोजक सुमित्तर भुल्लर, महिला कांग्रेस अध्यक्ष ज्योति रौतेला, राष्ट्रीय सचिव वैभव वालिया, महानगर अध्यक्ष जसविंदर सिंह गोगी, प्रवक्ता गरिमा दसौनी, युवा कांग्रेस अध्यक्ष विशाल सिंह भोजक, पूर्व महानगर अध्यक्ष लालचंद शर्मा, एनएसयूआई अध्यक्ष विकास नेगी मौजूद रहिन।
