इंग्लैंड कय दुई बार विश्व कप जितावै वाले मार्क वुड लिहिन इंटरनेशनल क्रिकेट से संन्यास

साल 2019 मा इंग्लैंड कय वनडे वर्ल्ड कप जीत अउर ओकरे बाद 2022 मा टी-20 वर्ल्ड कप जीत मा बड़ भूमिका निभावै वाले तूफानी तेज गेंदबाज मार्क वुड अब इंटरनेशनल क्रिकेट कय बिदा कहि दिहिन हैं। मंगलबार कय उ एक बयान जारी करि कै एह बात कय ऐलान कीन। अपनी चोटन से परेशान रहे वुड कहेन कि उ अब ई लड़ाई हारि गए हैं अउर डॉक्टरन कय सलाह मानि कै ई फैसला लै रहे हैं। पिछला कुछ सालन से वुड चोटन से बहुतै हलकान रहे, जेहमा बीता एक साल तौ उनके तईं बहुतै ज्यादा परेशानी वाला रहा।

वापसी कय कोशिश नाहीं भई सफल

वुड अपने बयान मा कहेन है कि उ वापसी कय बहुतै कोशिश कीन, मुला सफल नाहीं रहे। उ कहेन, ‘हम इंटरनेशनल क्रिकेट से संन्यास लेवै कय फैसला कइ लिहिन है। हालांकि, पिछला एक साल देखत हुए ई कवनो अचरज कय बात नाहीं होइ। हमका ई लाग कि ई कॉन्ट्रैक्ट खत्म करै कय एकदम सही समय आय।’ उ आगे कहेन कि हम हमेशा लड़ै अउर चोट से उबरि कै वापसी करै कय कोशिश कीन ताकि लोगन का गलत साबित करि सकी अउर बता सकी कि हम का कइ सकित अहै। बदकिस्मती से, हम ई बार हारि गए। डॉक्टरन कय सलाह कय हिसाब से अब हमार तईं टेस्ट क्रिकेट अउर वनडे खेलब मुमकिन नाहीं अहै।’

अइसन रहा करियर

मार्क वुड इंग्लैंड बरे कुल 38 टेस्ट मैच खेलिन जेहमा 119 विकेट अपने नाउँ कीन। वनडे मा उ 70 मैचन मा 80 विकेट झटकिन। दहिने हाथ कय एह गेंदबाज 38 टी-20 मैचन मा इंग्लैंड कय प्रतिनिधित्व कीन अउर 54 विकेट लिहिन। 2019 कय वनडे वर्ल्ड कप मा उ 18 विकेट चटकाए रहे। अउर 2022 कय टी-20 वर्ल्ड कप मा उ चार मैचन मा नौ विकेट लै के अपनी टीम का खिताब जितावै मा बड़ रोल अदा कीन।