इंग्लैंड कय तेज गेंदबाज ब्रायडन कार्स कुछ दिन पहिले एक नाइट क्लब मा पकड़ा गय रहें। हथकड़ी पहिने उनका वीडियो सोशल मीडिया पर खूबै वायरल भा रहा। एकरे बाद ईसीबी (ECB) भी उन पर कारवाही कीहिस अउर पुलिस भी जांच सुरु कइ दिहिस रहा। मामला मा अब कार्स का थोड़ी राहत मिली अहै। ई राहत पुलिस कै तरफ से मिली अहै, लेकिन खतरा अबहिन पूरी तराह से टला नाहीं अहै।
23 अगस्त कय सबेरे कार्स कय एक नाइट क्लब मा लफड़ा होइ गवा रहा। ओय बखत ऊ इंग्लैंड कय टेस्ट टीम कय हिस्सा रहें जउन न्यूजीलैंड कय खिलाफ सीरीज खेलत रही। इहे लफड़ा कय नाते कार्स का तीसरे टेस्ट मैच मा नाहीं चुना गवा रहा। कार्स का नशा करय कय सक मा गिरफ्तार कीन गवा रहा।
पुलिस बंद कइ दिहिस जांच
मामला डर्बीशर पुलिस तक पहुँचा रहा अउर पुलिस जांच सुरु कइ दिहिस रहा। मुला अब पुलिस जांच बंद कइ दिहिस अहै। पुलिस सुक्कवार का एक बयान जारी कइके कहेस कि ऊ डर्बी सिटी सेंटर मा मारपीट कय मामला कय जांच करत रही, जउन अब बंद कइ दीन गय अहै। बयान मा लिखा अहै, डर्बी सिटी सेंटर मा मारपीट कय जउन जांच चलत रही, ऊ बंद कइ दीन गय अहै। 23 अगस्त कय सबेरे डर्बी कय ‘द वार्डविक’ मा पुलिस पहुँची रही। हुवाँ एक मनई का नशा कय सक मा धरा गवा रहा अउर फिर अफस़र लोगन द्वारा पूछताछ कइके अउर डिटेल लइके ओका छोड़ दीन गवा रहा।
अबहीं जारी रही जांच
पुलिस कय जांच भले खतम होइ गय होय, मुला कार्स कय मुसीबत अबहिन कम नाहीं भई अहै काहे से क्रिकेटर नियामक इ मामला मा जांच जारी रखिहैं। हालांकि, नियामक लोग पुलिस कय जांच बंद होय कय बाद अबहीं तक कौनों बात नाहीं कहें अहैं। अब ई देखय वाली बात होई कि कार्स आवे वाले मैचन मा इंग्लैंड टीम कय हिस्सा बनत हैं या नाहीं। या फिर ईसीबी उनके खिलाफ जांच पूरी होय कय बादे मौका देई।
